close
响老豆未發現有癌症之前 我仲以為癌病係好唔關自己事 以為死亡離自己好遠。原來唔係 原來好多我地做開既壞習慣都會將我地同癌症既距離拉得越黎越近。
我同老豆的關係非常非常好，好感謝老豆帶比我同媽咪有一個好溫馨溫暖又快樂的家。雖然老豆走咗我們非常傷心，但老豆樂觀的性格一直感染著我們，所以雖然我這個獨身女要親自為老豆辦喪事係好傷心，但我們仍會樂觀堅強咁面對。
第一步 道別
今次入院原本係因為個膽既位置好痛而叫白車 原本以為入去檢查吓就會出返黎 跟據醫生所講 老豆係因為心臟承受唔到做通膽管的手術而導致心臟慢慢停頓而死亡的。還記得老豆最後臨走之前的中午，他說 你地去食啲嘢先啦。 （現在想起來，他應該是有心調走我們，不想我們看著他離去，不想我們傷心）。他，永遠先想到別人。
到我接到醫院電話，說 你們在哪裡？你爸爸快不行了。
我們立刻的士回醫院 到我入病房一刻，開簾，爸爸不動了 我望一望隔離床的叔叔，他檸檸頭 表示我爸爸已經離開了。
我接受了這個事實，最先要做的，是告訴他 我會好好照顧媽咪，不用擔心。（我本人絕對相信，人死後，靈魂/電磁波仍然存在，只是我們看不到）
姨媽有拜開佛，她說不要觸碰先人，也不要哭（先人會不捨得）。
所以我和家人都忍住了眼淚，大家都跟我爸爸說 不要擔心 我們會過得好的。
第二步 準備後事
辦過了婚禮又辦過了喪禮，其實在很多方面都很像。包括要BOOK 禮堂啦, BOOK 賓客(來賓先啱) 車啦，買定啲嘢食比來賓啦，封回禮利是變咗做封吉儀啦，買禮服變咗做買孝服啦咁
辦理死亡證
搵AGENT，
訂禮堂 有平有貴, 幾萬至幾十萬都有 我地住開大圍，最後都係擇返寶福紀念館 <<注意︰寶福紀念館同寶福山係唔同架, 唔好攪錯啊, 亦都可以提吓來賓以免去錯>>
買孝服︰嘩，搵咗幾耐, GOOGLE咗在香港買孝服/孝服香港/孝服深水埗-到最後先買到 ＜＜＜2020年8月發現個檔口無咗!!!! ⛔九龍深水埗福華街 慈愛護老院第二分院 下面的檔口仔, 掛住套白衫寫住白事的⛔＞＞＞, 好似係幾十蚊一套
<<注意︰第一晚去靈堂記得帶定自己衫換，而家香港多數唔守夜, 唔會响靈堂守夜, 但離開時最好留返套白事衫响靈堂, 唔好帶返屋企, 第二朝返黎著返>> 我無帶比啊媽閙咗一餐...哈...
無咗❗❗❗
去醫院領屍, 原來同睇戲係倆回事， 我地領屍係唔會入去雪櫃房，唔會見到師傅拉個銀色櫃出黎。 領屍需要帶文件，自己的身份證， 跟長生店職員約好時間 （無記錯應該係第一日去靈堂的早上去領屍的），在醫院大堂見到職員， 一齊入去醫院的停屍間。麥爸爸在威爾斯過身，所以在威爾斯領屍。
第三步 安撫自己及家人的情緒
多得老豆係一個好樂觀的人 佢將佢的樂觀都感染晒我地 所以我同媽咪都盡量以放開啲 唔想佢走得唔安樂的心態去面對呢件事。
我自己會諗 我,當然係好傷心。 但如果我係佢, 我又會覺得死又如何呢？我死唔緊要 最緊要屋企人無事。 😒 最當災既咪就係我地呢啲留下來的人囉 喊死我地啊真係 一齊走都無咁慘 最慘係留落黎果個
媽咪心態都好好 都係覺得老豆瀟灑來 瀟灑去 老豆都係想我地過得好
第四步 申領人壽保及遺產
人壽保要睇佢間保險公司要咩 多數一定要死亡證正本(政府發果份 你可以叫agent幫你申請死亡證時 申請多幾張正本 好似140蚊多一張) + 申請攞人壽保的申請者與死者的關係證明正本 (出世紙/結婚證書)呢啲佢親眼望過會比返你 我果時好緊張 望住佢地攞去邊 因為正本得一張 唔可以唔見。
第五步 搵排骨灰龕的資料
我搵的時候係剛好申請排屯門曾咀 在排到之前，爸爸的骨灰都是暫存在幫我地攪後事的agent度。我地間agent有2層，2樓有一格格同溫和燈光，感覺幾好的。
第六步 訂立新的目標，新的嘗試，不浪費這寶貴的一課
老豆走咗之後，媽咪同我都分別去咗旅行，當時仲未有疫情。
之後我去咗學楂車同考咗車牌
22年生咗小b,如果公公4响度就好lu,我老豆好識同小朋友相處，小朋友都好鐘意佢。我有幸做佢個囡，可惜在啊b見唔到公公 無得同公公玩。
((持續update中...但因為太難搵到買孝服資料, 所以SHARE咗出黎先))
夢見死者 唔知係咪太掛住老豆呢 都夢見過3次
第一次夢見我唔記得老豆走咗 仲响度傾閒話
第二次我知道老豆走咗 老豆仲問吓我呢排點 媽咪點 我話我好掛住你啊 媽咪都好掛住你啊 醒咗之後我喊死咗 實在太掛住老豆了 唔捨得咁少時間"見面" 呢件事我無同媽咪講 我怕她會喊。
跟住神奇地過咗幾日 媽咪都夢見到老豆喎 起身後佢仲好開心咁同我講見到老豆 擔住口煙 問佢呢掛(老豆過身後)過成點啊？ 媽咪仲話果晚半夢半醒之間老豆摸佢個頭 幫佢蓋被
2019年10月24日
尋晚又夢見老豆 肥返啲的版本 (有cancer後廋咗) 我地企响條走廊度 左邊係啲公廁 我地對望住 。 我認得佢架 我當時唔知自己發緊夢 我仲諗呢個人咁似我老豆既? 跟住我諗住我唔識佢架嘛 雖然想同佢講嘢但都無 跟住我行近啲佢 望吓啲廁所 佢就同我講嘢了 佢攞咗份嘢比我簽 封面好似係黃色既 唔知咩黎 我問佢 你有無掛住我啊 (老豆生前我一返屋企就會咁問佢 仲一定要佢答有 哈哈) 我仲捉住老豆隻手 同以前掂到老豆啲皮膚的感覺一樣啊!!! 都好神奇 訓醒後當然又喊餐飽 次次都喊好耐
2019年11月8日
啊。。。好掛住老豆啊 呢幾日都好掛 一諗起老豆就不期然流淚。 老豆真係一個好好的人,朋友, 想起他的朋友都讚佢的好 真的很不捨。
不過我送佢總比佢送我走好既 我都唔忍心要佢咁傷心。留下的人 是痛苦的。樂觀如我 也會有很傷心的時刻。
2020年1月6日
啱啱過咗新年 朋友們都同我講新年快樂, 謝謝他們的祝福。對我而言, 老豆走咗，又點會快樂鴉。就算去旅行都唔會快樂, 好掛住好掛住老豆, 呢幾日發過一個夢 夢見"無事", 所有事都無發生過, 老豆無走到, 幾好呢。醒返先發覺係一個夢, 事實歸事實, 仍然要面對。面對失去, 面對照顧家庭的壓力。
2020年1月7日
唉 見親啲司機大佬都會諗起老豆 好掛住老豆啊
2020年1月21日
由於老豆抽到屯門政府骨灰位 今日殯儀agent send來造墓碑的版 一見老豆張相我就忍唔住噢响公司流淚 好在公司當時無人。 仲有幾日過年 免得媽咪傷心 我整碑既事我都無問佢意見。好掛住老豆腐幾時先可以落去見佢。
2020年3月17日
早幾日又喊死
2020年3月29日
一年了，一年前既今日我唔容許自己傷心，我把所有老豆的樂觀都攞出黎安慰自己及家人，因為我怕自己崩潰了就照顧不了傷心的媽媽。呢幾晚我容許自己放一點點心，回想同麥爸爸的回憶。很傷心，眼淚無停止流下。
沒有一個人可以明白，沒有一個人可以傾訴，這經驗是很孤獨的。
2020年7月11日
好掛住麥爸爸啦，，， 我考到車牌喇，係咪好叻女呢！ 😊
仲記得之前你响醫院，我問你駛唔駛睇吓本道路使用者守則解悶啊？ 哈哈。。其實要睇都應該係睇馬經。。
在你面前說過要做既事，我做到了， 不枉我肥咗2次都堅持考落去， 哈！！
如果可以一齊慶祝就好lu 不過唔緊要， 終有一日會再見
2020年7月18日
2020年9月16日
掛住掛住老豆 幾時先可以再見？ 好多時我會把事情當作老豆只係去咗好遠既地方 以平伏自己既心情 但思念總會有的 。掛死人 黎報吓夢都好鴉
2020年11月30日
噚晚夢見老豆， 又唔記得咗老豆走咗， 夢見一齊行街， 好掛住老豆。。醒咗又繼續流淚。
點樣可以分辦報夢還是思念下引致夢見？ 我懷疑可能就係夢見既時候我地知唔知佢已經過身吧？
我真係好掛住老豆。。。幾時先可以見
2021年3月29日
3月好像特別傷心 麥爸爸都係3月走既 唔知關唔關事呢
如果我家人伴著我離世 只望他們不要太傷心就好了 對你地黎講我離開了這世界 對我黎講我的新旅程才剛剛開始
＃懷念所有離我們而去的親人朋友
達哥，智叔 一路好走
而家我未生b 如果我過身 我唔會難過 因為終於都可以落去見老豆喇😀 但會比佢閙囉 唔幫佢睇住媽咪。。
2025年4月7日 清明節
嘩 原來我咁耐無返黎update 。
可能2022年生B實在太忙，中途有拜過幾次山，但都無時間update。
唔知係咪清明節關係呢，早幾日我無啦啦在餐廳喊，好似感受到老豆返黎睇我？ 唔知，因為我睇唔到。
再上一個星期，我在大家樂食緊下午茶，突然有個啊叔問有無人，就坐低咗，當時我諗 如果仲可以同老豆食飯就好了，又忍唔住留淚。呢次喊純係因為掛住老豆，同靈異無關。
呢排都係比較眼淺，好容易諗起老豆就喊。
所以啲人話 究竟幾耐先會放得開？
其實我覺得掛念一定有，可能掛到我都走埋，哈哈。
我對自己走呢件事又擔心 又唔驚。
擔心係，無人可以照顧我個女
唔驚係 我可以見到我老豆 同佢處於同一空間 終於都可以見了！！
啊，24年香港上映了破地獄這電影
我還滿抱著期望 希望佢會告訴我怎樣超渡我這個生人
結果並沒有 很是失望呢～
所以，有同路人一齊傾談 會比較好 因為有些心情諗法 外人永遠都唔會明。
老高片：人跟本不會死
https://youtu.be/OsajhwXixoo?si=X48lE0uF_AyKA8SK
同路人，無論幾點，你都可以打比我傾吓計 852-64862352， you're not alone.
全站熱搜
留言列表
{{ article.title }}