啊麥的私人天地

2021年，我首次懷孕了，很感恩BB的來臨。現在記錄一吓這些珍貴的回憶💕

 

 

2021年9月11日，應該就是bingo的日子，那天剛巧跟老公有心情，又剛巧是apps 顯示高機率的日子，就沒防避進行了～

 

2021年9月22日，中秋節！！ 豪不知情的我竟然約咗我契妹去西貢沙灘玩通宵🤣🤣🤣 當晚我們野餐，食生果，食月餅，食雪糕月餅，聽住mirror 的歌，訓响營地望星星，非常寫意。就係咁，我就响豪不知情的情況下陀住啊b玩咗一晚通宵🙈

 

2022年1月25 ，今日照結構啊，有少少緊張， 尋晚叫埋爸爸同啊b講 “要乖啊，聽日要聽醫生話啊” 。今朝麥媽媽整咗鮮奶粟米片蛋早餐，食完就出發去羅宇航醫生醫務所等。我預約了 10：15， 入到去我地係第3隊。等到11：30分倒就入去照喇。 每隊都好似係照20分鐘倒。

坐上床，醫生照了頸皮（無唐氏風險），數手指仔，數腳指仔（齊5隻），大肶骨，睇咗腦圍，左右腦，睇咗心仔心室（無心漏），腎，肺，胃，膽，尾龍骨，耳仔，眼仔，嘴仔（無兔唇），鼻仔（高）

 

2022年3月

因為中咗新冠肺炎而入咗院，詳情在另一編文章

 

今個月踏入29週，臭豬豬非常活躍

 

2022年3月25號

Some sweet moments with 臭豬豬

事件一
沖涼的時候個肚硬咗，我話“臭豬豬～唔駛驚喎，沖涼仔嘛” 跟住好快個肚就淋返晒😊 呢隻豬豬真係聽話

事件二
準備訓覺的時候爸爸放咗手上黎肚度，啊b今晚勁活躍，好似開party咁，無時停，到夜了，我話好喇，你快啲訓，佢仲係唔聽，跟住我閙佢“你好快啲訓喇，唔係我打鑊金你架” 跟住佢真係唔再郁 😂 如果出咗世都係咁乖就好lu~

2022年4月5號

今朝摸肚啊b無反應，老公將手放在我的肚上，同啊b講“起身喇，唔好訓喇” 啊b繼續無反應。但當老公一講“食意粉好唔好啊？” 啊b即刻郁咗一吓，仿佛在說“好啊！”。 原來佢唔係未訓醒，只係唔so 我地，到有嘢食先彩吓我地，勁攪笑。我話咁有性格都唔知似邊個 老公話咪隔離果個囉 正一臭豬黎😆

2022年5月14號

 

親愛的，距離預定見你的日子還有13天。在這10個月的懷孕過程，我沒有太大的唔舒服，只係臨尾這2星期才感覺到恥骨痛，媽咪很感謝你錫住我。

 

今天最後一次私家產檢，醫生開了入院紙給我，也總算放心了不少。若然你真係曳曳豬衝閘，我也可以緊急入私家醫院。

 

我怕我將來會把這初心忘記，現在先寫下吧。

 

媽咪只希望你能健康快樂地成長

我希望你會同我講秘密

我希望我會令你的同伴羨慕你有我這個媽咪

我希望你是活潑開朗的

我希望你是善良的

我希望你能享受生命的美好

 

就快要見面了，我愛你啊乖乖豬。

 

2022年5月19號

上星期香港一直下雨, 新買果啲BB 衫都未洗。呢幾日終於都可以洗衫喇!!! 好嘢!!

哈, 做咗幾十年人, 都無洗過幾多次衫, 而家先黎做, 日日洗掠摺啊B啲衫, 真係不孝喇我。

尋日都仲係掠得好慢, 今日已經好熟手lu, 果然當媽係會令人極速進步, 哈哈。

一路聽住 Twins, 一路唱歌一路掠衫, 非常享受這個me time ^////////^

我希望, 將來還會記得對自己好, 還有自己的時間做自己鐘意做既嘢, 繼續享受生活。

2022年5月26號

今天是預定開刀生b的日子

尋晚好彩我老公催促我執走佬袋，否則我又會變成臨急將啲嘢塞晒入袋算，哈哈。

頭先開完刀，嘩 呢個經歷真係唔講得少。

人生第一次做手術，真係好驚驚架，不過訓上了手術床，臨入手術室時我都拍拍個肚，同啊b講“唔駛驚，媽咪响度” 其實分分鐘我仲驚過佢😂😂

今朝好早起身，6點起身，6點半前要食完早餐，食完執埋少少行李就call Uber, 入到法國醫院先上3樓做入院登記，我地一入門口班姑娘就好似衝峰陷陣咁bilibala 整咗好多文件，跟住叫老公落去會計部比一萬蚊訂金。

而我呢就跟姑娘入房即時做快速檢測，剃毛，測胎心機。

由於我有買儲臍帶及臍帶血 （如有需要我可以介紹我响 Cryolife 個Agent比你，佢會加送多2年比被介紹人），在登記入院時我跟姑娘說要留，姑娘就拆咗個紙盒，拎咗一包嘢比我（內有3個樽仔既），叫我一陣被抽血時比埋姑娘抽，抽好了就放返在Cryolife 的收集箱內。另外簽了免責文件，話若醫院抽唔到臍帶血都不需要負責任。不過我都問咗姑娘，如果抽唔到臍帶血，會唔會出返份醫證明，因為要有此證明，若抽不到臍帶血，Cryolife 先會退訂金。

跟住上房lu, 一到床邊，姨姨就教我怎樣著手術袍，有一件衫，2條腳套，一頂手術帽。我預約了12點半做手術，所以11點半就要著好手術袍在床上等。

一路等，一路緊張，好似平時咁，一緊張就肚痛，仲去埋廁所添🙈 💥💥💥順帶一提，無論係疫情問題又好，有潔癖都好，預先淘寶定幾包即棄座墊真係好重要！！好重要！！！好重要！！！！！重要既事情要講3次~💥💥💥

12點幾，要過床喇！！

💉💉💉有買儲臍帶血既媽媽記得响呢個時候提姑娘把儲血盒放在手術床上，帶埋去手術室啊💉💉💉

第一次做手術，真係好緊張啊！！當手術床等電梯時，我拍拍個肚，同啊b講 “唔駛驚架，媽咪响度”， 但其實驚果個係我😂😂😂。心裡想著“麥爸爸要保佑我地啊” 時，差點流眼淚了。

九龍聖德肋撒醫院手術室位於1樓，雖然名叫“手術室”，但原來入面係勁大架，有大約7張床等做手術。未入去queueing room 之前，有位高級姑娘核對我簽過既文件，話係法律文件所以要用formal 簽名。我補簽返之前簡簽啲文件後，姑娘就把我的手術床推入手術室等候區。此時姑娘叫我老公去左邊間房等，佢係唔會入黎queueing room 既。

入到去姑娘把我的手術床“泊”在一邊，而我的儲血盒就放在床腳，叫我休息一吓。隔無耐就有姑娘入來幫我量血壓，及位麻醉師來幫我“種豆”， 媽媽whatsapp 群組提過最豆呢part 已經係最痛，比麻醉更痛，我覺得還可以，這是可以接受的痛。

等多十幾分鐘後，入手術室lu。此時因為老公不在，我怕姑娘忘了他，我問姑娘幾時叫老公入黎手術室，姑娘話等我打完麻醉針，佈好乾淨布後，就會叫老公入黎陪產。

入到真正的手術室，原來真正既手術室係超光猛架，唔係好似妙手仁心咁一間暗既房及射燈。第一個程序係過床，自己慢慢由運送床移動到去手術床上，姑娘隨即把血壓計

綁在左手手臂上，右手就吊緊鹽水。

要打麻醉針喇，姑娘叫我把身體向左側訓，頭dup低，膝頭彎曲，好似成隻矕弓蝦米咁，跟住pat pat同膊頭都要tun後啲，麻醉師會在背部突起既部分打麻醉針。💉打麻醉針痛唔痛？我覺得好似平時打針咁，有少少痛既感覺。聽人地講會好痛，有啲出咗院都仲痛，不過我無後續痛，可能個個麻醉師手勢唔同💉 感覺上好似打了3支麻醉針。襯個pat pat仲有少少力，個人要由左側訓向返平訓。

隔無耐，法國醫院尤達雅醫生入咗黎手術室，打聲招呼後我面前多了一大塊紙，射燈和心口下發生咩事都睇唔到lu。

❓ 剖腹生產痛唔痛啊？

⭕ 我做半身麻醉，只會feel到有人掂自己，但完全無痛既感覺，現代科技真係令我嘆為觀止。竟然可以上半身非常清醒，我可以同老公講嘢，可以擰個頭去影相，而同時我個肚被人劏開咗，但我又唔痛，真係好神奇啊！

❓ 尤達雅醫生開刀好唔好

⭕ 超好，超快手，經驗同埋技術一流。我記得尤醫生到咗手術室無耐，行埋黎手術床邊，好快就聽到佢同姑娘講要呢樣果樣手術用具，原來我已經被人“湯”緊，但又真係無感覺個喎，現代科技真係好利害。尤醫生勁快手，唔駛幾分鐘，啊b已經出世喇😂😂😂 我好似聽到佢話4分鐘。而且我聽到佢同其他人講唔好打針住，等佢儲埋臍帶血先，我覺得佢真係好細心啊！！極力推介！！

講返老公，我被劏開無耐，就聽到姑娘話老公到咗喇，捉住太太隻手，好快就聽到醫生姑娘講 “恭喜bb出咗世喇”

聽到隻臭豬豬喊，好大聲咁喊，成間房都聽到喇，我好感動，左邊隻眼流咗好多眼淚。我都唔係好知點解會流淚，可能因為覺得佢咁有精神，中氣好夠，覺得佢健康我就已經好開心了。可能真係因為擔心咗佢好耐，終於放心少少。又有可能係因為懷孕過程有時會辛苦，但見佢咁精神，我又覺得好值得。又有可能係因為覺得好神奇，我咁細細粒但呢個人仔原來一直在我肚中生長，又真係一個人仔，係mini me, 真係好夢幻，好神奇。神創造了世界，

創造了繁殖這事，amazing ! 

💖同bb影既第一輯全家福💖

之前我同老公都以為會用我地自己手機，但原來唔係架，係姑娘拎住部舊相機幫我地影咗好多張相。

影完姑娘帶埋BB，帶埋老公走咗lu。

縫針，一路縫一路傾計，真係要超熟手先做到，勁啊！而我就訓著咗。。。

手術完成，尤醫生話手術成功，我真係好感激佢。

我見到姑娘幫我抹身，有好多有血既綿花，先意識到自己做咗手術😂。姑娘把我由手術床移動到運送床，再泊返入去queueing room既其中一格做量體溫， 量血壓 。我同姑娘講覺得凍 成身震， 姑娘話係正常既，麻醉藥散緊係會成身震，唔係因為凍。不過佢都比多一張被比我。

上返病房，見返老公喇，好嘢！

老公同啊b上黎房時影多咗幾張相，我一路睇相一路同老公傾計。原來老公已叫人黎收臍帶血，Cryolife 仲送咗禮物籃黎，雖然話我地比咗錢買plan，但係都幾sweet既。

好快，我又訓著咗了。

手術後幾個鐘，姑娘話可以食粥水，幫我叫咗個＄15既粥水，老公餵我食埋先走。

晚上姑娘幫我換成人尿片

又提我麻醉藥散後要郁吓對腳，個身要向左碌，向右碌

尤醫生臨放工前上咗黎探我，我同佢講咗好幾次多謝，感謝佢接我囡囡黎到呢個世界

2022年5月27號

今朝食咗豬肉碎粥

姑娘們好好，幫我換片，沖洗下體，抹身，加水入暖水壺，都幾好既

兒科醫生入黎 啊b收咗水，今日2.145kg

麥媽媽黎睇b同埋探我

老公買蛋糕比我食。

有一刻有莫名感動，老公話踩咗我對拖鞋，當佢蹲下幫我抹拖鞋時，我覺得好幸福。 這個人，真係好錫我，好照顧我，我真係好幸福。🥰

夜晚餵啊b,佢濁親，呼吸又唔暢順，嚇死我又喊死我啊😭😭😭😭😭

2022年5月28號

今朝只係叫咗碗白粥，因為內片粥要成30蚊，白粥只係少幾片肉片但只係13蚊😂 。 連埋尋晚老公買既蛋糕仔，都夠既～

跟住姑娘入黎問駛唔駛預約睇bb,我約咗 13：15， 跟住打比媽咪問佢黎唔黎睇啊b,佢話問吓姨媽黎唔黎，最後姨媽唔得閒，遲啲先黎睇b。 跟住我打比老公，佢話老爺奶奶要夜晚先黎到，咁我就預約埋17：45， 因為18：00要餵奶。

09：30 聽講座，係法國醫院提供比產婦既，內容有產後護理，食譜等等。聽聽吓講座兒科醫生到咗，好消息！！！啊b血型係positive啊！！！yeah (/^▽^)/ yoho!! 又過了一關，好嘢！！！ 另外，無黃膽，唔駛照燈。 如果啊bb 真係好似老豆咁健康就好lu~~

12點餵奶，又再次見到啊b喇，開心仔。尋晚啊b濁親嚇死我，今日啊b肯飲奶，又飲得順利，又好乖乖咁超額完成，飲咗成2安士，做媽咪既我梗係放心晒啦，今次既心情同尋日真係差天共地。今餐啊b食得快，我可以好快返病房。一返到房就見到盒蕃茄豬扒意粉，不過凍咗lu，我一向都唔鐘意食凍咗既嘢，不過為咗隻臭豬，無計啦。

未食完個意粉又夠鐘出去睇b了，得我自己一個睇b

返到房啲意粉已經凍晒。。。

睇完b, 都差唔多2點了，只係訓咗一陣，又夠鐘15：00餵奶。今次隻臭豬勁眼訓，只係食咗唔夠1安士。餵咗我成粒鐘啊衰豬豬，我又不自覺壓住咗個開刀傷口成粒鐘。。

臭b放長屁屁 我話“喂～你係女仔黎架” 似佢老豆。。。唉。。。＝＿＿＿＿＝

到18：00餵奶，啊b仲係未餓，一啖都無食過。

姑娘好好，推啊b出去比老爺奶奶睇b先，佢之後先幫啊b補奶，法國醫院姑娘真係好好啊😊

老公話老爺奶奶在醫院門口被禁止進入，老爺好勞氣，好彩最後都睇到bb 

佢起走後，老公買蕃茄吞拿魚意粉比我食，跟住佢去Aeon,食銀龍，回家。 老公今日砌好咗張bb 床，爸爸好叻叻啊。

本來21：00仲有一次餵奶，但係我同老公講個傷口痛，老公叫我唔好餵，休息吓，咁我就取消了。

尤醫生話聽日12點出院喇

暫時總結：

到呢刻為止都好似好唔真實咁，雖然一切都係預先計劃好。 由計算最有機會bingo 的日子，到行動，胃痛入院而發現有咗，唔係好辛苦咁過咗9個月，驚嚇咗一日做咗手術，在手術室聽到bb 喊聲，呢幾日餵b, 啲姑娘話佢係我個bb, 係我個囡囡，一切都好似經歷得好快，好唔真實，好似發夢咁。

我好榮幸囡囡擇咗我做媽咪，又好開心啊囡好可愛，媽咪成個心都比晒你。我不能自控地，不由自主地，心情全因你而影響，有你，有你爸爸，我終於感受到幸福的感覺。

2022年5月29號

今日同啊b出院喇！好嘢！

比較托賴的是啊b無黃疸，可以一齊出院

出院是由舅父即係啊b既舅公楂的士來接我們的😊

尋晚姑娘問我今朝聽唔聽講座，我當然聽啦 原來係出院講座黎架

聽講座時咁啱兒科曾志豪醫生過黎講啊b狀況 話啊b無黃疸，無胎記，可以出院。

聽完講座，見埋尤醫生，落會計部比埋錢，就上返黎哺乳室接啊b喇，yeah!😊

還記得我同姑娘講：「我唔識抱喎」

姑娘教我點抱，放啊b在我手中，同我講：「你係媽媽黎架喇，你得架」。真係好鼓勵性😁

跟住姑娘同我對咗啊b啲手指仔，腳指仔，對埋我個名，就幫啊b剪咗左右腳的腳帶，出院lu~抱住啊b出咗哺乳室門口，見到老公，老公話：「你抱啊？」我話:「係啊」咁就一齊搭電梯走lu

回到家見到陪月Jenny, 她幫啊b沖涼，亦已準備好薑水比我沖涼，佢話洗完頭要即刻吹乾個頭。由於我之前買咗好多淘寶嘢都未到，當下佢問我攞乜無乜，真係七國咁亂啊哈哈。有綿花但無綿花盒，有換片床但係張換片墊又未抹乾淨 有紗巾但係無沖涼毛巾 係啊，係連條似樣啲既沖涼毛巾都未有啊陰公！！！哈哈哈哈哈！！！！ 我啊媽當然係睇唔順眼啦，又話我點可以咩都無準備好架？其實。。。我地已經準備咗好多嘢架喇。。。。只係有啲甩漏，未準備得晒咋嘛。。。。。

跟住好快我地就出Aeon 買咗 Minimoto 既竹毛巾做沖涼抹身巾，又滑又快乾，幾好架。講返轉頭，其實我地一直都未買沖涼毛巾係因為我睇咗好多次made in Japan 既毛巾都唔啱，全部都唔夠滑，而啊媽之前又話一定要買日本制既比啊b...所以先一直都無買到。。。。

返到屋企，Jenny幫啊b沖涼，煮咗嘢比我同老公食，跟住都差唔多放工lu。

晚上我幫啊b換衫時發現啊b隻手腫咗😭

如果我早啲發現就好啦...可以問埋曾醫生嘛.....

2022年6月3號

今日係紅日 曾醫生無返，成間法國醫院都無兒科醫生當值。。。。

我地求其睇咗一個醫生，佢都答唔出，淨係話要觀察多幾日睇吓係咪打完卡介苗既反應喎

2022年6月4號

問咗曾醫生，佢話可以照超聲波睇吓咩事，情況似係淋巴塞咗 但啊b唔痛，暫時唔需要擔心

2022年6月8號

我放風喇！！！！！！

唔記得咗係咩原因，我今日可以放風行街，我地行咗 mega box, 買多咗幾條沖涼毛巾。

由於太耐無行街喇，又時間有限，我就行得好快，見步如飛咁，老公就好驚嘆而家既手術技術可以咁西利，唔講真係睇唔出我幾日先先做完個開刀手術。。。

2022年6月10號

十二朝，姑姐同埋表姐過黎食薑醋，睇啊b,好開心啊。

如果唔係有疫情，多啲親戚過黎，仲開心啊，真係可惜。。。

2022年6月12號

怕啊b r損自己，所以自制咗套手手裝置

2022年6月25號

啊b好似嫌燦眼，識得用手擋住 有性格

2022年6月26號

滿月喇！！啊b 2個契媽分別在不同時段來睇啊b

仲有爺爺嫲嫲，姨婆

好熱閙啊！！

1個月後感想：

首先好多謝啊b選擇咗我做佢媽媽，可能當時天上既天使同啊b講 「嗱，呢位媽媽呢會比你好大自由度既，但佢既缺點係做嘢甩甩漏漏，你諗你喇」既情況下，啊b擇咗我，好感恩。啊b出世頭幾日，甚至近乎滿月之前，我都唔係太link到自己同眼前這個小人類的關係，好像似終都不相信她就是從我的肚子出來的？真不太敢相信，哈哈。

感謝主，人類及動物的設計真是很神奇，很奇妙，本來我肚子裡什麼都沒有，9個多月後我「生」了我的小寶寶？這個是我的女兒？真的是我的？真的？我喎，我咁細粒，生到舊咁大舊既嘢出黎？真係我個喎，真係好似發夢咁😊

頭幾日真係太忙，又要準備呢樣果樣，啲嘢既位置又未setting 好，淘寶啲嘢又未到，啊b又要睇醫生，又唔夠訓，啊媽又嫌3嫌4，我崩潰，喊咗。姑姐明明叫過我千祈唔好喊，但最後都係喊咗。。。

2022年8月1號

出世2個月零6日 今日啊b發出疑似「媽」的聲音 好利害喔👏👏👏👏

2022年8月12號

今日教啊b講「奶奶」啊b發咗2吓音「哎哎」好叻叻喔。

今日我望住啊b,佢情深款款咁望住我，我流淚了，流咗好多滴眼淚，我害怕失去佢。

2022年9月16號

今日去法國醫院打第2支五合一針價錢 ＄1350

以前，中學或工作時期，我曾經有過自殺的念頭，如果你有我想自殺的諗法，死前，不如借啲時間比我，將以下由[💩開始  睇到 💩完]，無時間就由[❗開始 睇到❗完]希望可以改變到你的諗法

 [💩開始

2022年10月8號

當媽後想起了好多細個時零碎的回憶 想起了中學時期媽咪見到啲中學生自殺的新聞時會對住個電視機說:[啊媽咁辛苦養到你咁大個 (你)走去自殺， (個啊媽)真係慘] 當時我無咩感覺，只係後期當我有自殺諗頭的時候 (<-年青時) 就會想到媽咪咁辛苦養大我，不能令她傷心，原來，做人啊媽之後，係完全另一個體會啊。子女有事，係比死更難受，子女有任何事，都會令媽咪心臟停頓。

從知道我懷孕開始，我就已經很擔心了。

我，是個高齡產婦。以前麥爸爸催我生仔時，我會想，唉，媽咪都係33歲先生我咋嘛，我到33歲先生都唔遲，但原來，我好Kai 咁，計漏咗懷孕要一年，即係話我啊媽係32歲懷孕 33歲生我... 哈，我最後係33歲懷孕 34歲生了愷恩。 打從懷孕開始，我就已經開始擔心了。因為麥爸爸過身了，我怕媽咪寂寞，我同老公都由土瓜灣搬返去我娘家沙田陪麥媽媽住，因為生活環境好咗，我對於啊b的成長環境有信心了，於是就開始了準備懷孕計劃。這年，我32歲。 這年間我download 了計算懷孕機會率的apps,睇中醫調理身子，積極做運動希望能懷孕。過了1個月，3個月，半年，一年，我仍然未懷孕，直至21年9月月我因為胃痛睇醫生，才發現了這個期待已久的好消息，我終於都懷孕了！ 

因為非常不容易我才懷了孕，我做咩都好小心翼翼，我唔敢講比人知，因為怕bb小器，我又千叮萬囑媽咪唔好講出去，都係怕bb小器。以往成隻老虎咁眼望前面就行得好快既我變到行每一步路都好慢，因為我怕自己 kick 親，跌倒會有危險。 呢段時期老公好好，成日送我返工，陪我收工。我食既每一樣嘢都上網check 過，話係孕婦可以吃我才會吃，只要有一篇報導話唔食得或者唔知食唔食得，我都唔會食。呢段期間我戒口比平時濕疹戒得更清 所有我喜歡的食物都不能吃 包括蛋糕 （因為可能含有生蛋，有菌），脆香雞翅，雪糕，雪條，餃掂個狀元湯，茶，任何茶，Earl Grey，普洱，天仁綠茶 （我超鐘意飲茶，懷孕前每日一杯濃茶係必需的）懷孕後只能飲水，還有譚仔，朱古力 （因為有咖啡因），蜂蜜（驚有菌）這些這些通通都不能吃。講完食，到講做產檢，有唔同既產檢，有檢測唐氐綜合症的，我還記得當時在診所等的時候，我查看有關高齡產婦懷有此等孩童的機會率比較高，我非常擔心 驚到個身震晒 做完了檢查也一直擔心，直到報告說一切安好才無咁擔心 然後同老公講 又過了一關。 從超聲波，T21，到 照結構，一關又一關，心裡經歷了一場又一場的擔心，好不容易才到了穩定期。

從懷孕開始，我就有了超嚴重濕疹。懷孕前我本身都有濕疹，但是屬於輕微的，從懷孕開始，我左手無啦啦起了紅色一撻 跟住蔓延到雙手，雙腳，整個背脊，胸，心口，總之就全身無忽好肉。因為抓損了，成日甩皮，甩到成張床都係皮，甩到成個地下都係皮，我仲比啊媽閙添。因為濕疹發得咁勁，我唔敢飲奶，只食鈣片。連最喜歡的蛋都唔敢點食。

懷孕後期，因為怕睡姿會影響胎兒，不能用自己慣用的睡姿，所以訓得好差。醫生話要用枕頭墊高對腳，網上又話仰睡會對胎兒生命構成危險。每朝起身都擔心啊b, 真到啊b動了動才放心下來。有時，當我站立時，啊b會隋落到好下面，好像就快要破開我下面一樣，會痛。我就叫老公同啊b講 要乖，上返去，佢又真係聽佢爸爸話。有時零辰一點啊b勁活躍，動來動去，都係靠爸爸同啊b講 要乖，聽日先玩，好彩佢聽爸爸話。

[❗開始

直到生產後，也沒有放心下來。驚心動魄的一次，嚇死。

生完第2日，我去醫院的哺乳室。有一次餵餵吓奶，啊b

嗆親，啲奶由個鼻度噴返出黎，姑娘抱走話佢會處理，叫我走先，我走了但又唔放心，等一陣後返返去哺乳室想睇吓啊b,叫姑娘抱比我睇，姑娘話啊b無事，已經訓咗，我望住啊b，佢雙眼合埋，已經訓咗，我眼淚已經湧到眼框，但又唔想姑娘看到所以死忍住，見到啊b無事，我就返返自己病房。返到床，我喊了，喊得撕心裂肺，喊到停唔到，真係以前分手都無咁爆喊。之前明明姑姐千叮萬囑我坐月期間不能喊，但我生完第2日已經喊，仲要係爆喊。

我心諗 以前分手喊都係喊得好慘烈，但男朋友係可以自己擇，我可以選擇一個不會令我傷心的人，或者我可以選擇由邊個黎控制我個心，但呢個b，估唔到佢一出世，手上就已經緊緊地拿捏著我的心，佢有任何事，我就立刻崩潰。

所以我奉勸某部分想自殺的人，你自殺同殺咗你啊媽係無分別。 媽咪，真係會好傷心，你走咗，會跟埋你一齊走。

我而家先明白，原來媽咪話辛苦養到你咁大，你死咗媽咪會好傷心的感覺。唔係話咩投資咗幾多錢落去養你，而係每一日，媽咪都會好擔心你，換句話說每一日你都揸住啊媽個心，可以隨時揸爆佢。真係，由你仲係個胚胎細胞開始，到出咗世，再到你過每一日人生，你的一舉一動都

牽動著媽咪的心 你有咩頭暈身㷫媽咪都會嚇餐死 身體髮膚 受諸父母 原來係咁解 真係做人啊媽先明 原來自己子女才是撑握自己生死的人。

💩❗完]

2022年10月13號

今朝6點抱住啊b想餵奶， 佢一路望住佢老豆，一啖都唔肯食我手上支奶，又係咁左右左右咁望，我話:你先4個月人仔，唔係真係咁醒，諗住唔想媽咪餵，要嗲哋餵，所以唔食我手上支奶吓嘛？ 跟住我地諗住試吓叫嗲哋餵，點知。。佢老豆抱住佢，一放入口就食。。。呢條友仔。。🤦‍♀️

2022年10月15號

今日啊b第一次出車，第一次去沙灘踏沙沙 （∩▽∩）

今天早上麥媽媽話我地要強制檢測，咁我同老公就搵吓邊度既檢測中心會少人啲，跟住見到愉景灣，結果我地就去咗愉景灣喇哈哈。

本來諗住1400出發，但係因為第一次出BB車的關係，要整架車消毒，結果攪到成1545先出發。。哈哈

過到去中環，入咗碼頭，終於見到爺爺嫲嫲了，爺爺一見到啊B就超開心，啊b仲未見慣爺爺嫲嫲的關係，又因為之前出親街都有陰影，所以成個悶悶不樂咁既樣。不過一見到老豆又開心返晒。老爺仲話：哎呀真係喎，好痴老豆喎。跟住搭1700船，嘩成46蚊架。

一落船就去咗廁所先，跟住行去沙灘。行人路有條樓梯落去沙灘，我地就在樓梯頂放低架BB車被老爺奶奶睇住，老公抱啊b落沙灘，我就拍片紀錄這個重要的時刻。

BB第一次踏沙，隻腳被拮拮不喜歡，哈哈。

踏完沙沙我地就入商場哺乳室餵奶，曳曳B淨係食咗2oz 就扭眼訓。

佢食完，就到我地食喇。

我今日想食好啲，食豪啲，最後都係食返ZAKS, 都係坐sea view 位，最驚喜係仲有迪士尼煙花睇。

食完飯，就搭船走lu。

2022年10月30號

今日我個女第一次介傷手😭 做媽媽的我太粗心大意了，

明知道個盒有條鏠都比個女玩，我錯了。。。

2022年11月5號

今日啊b第一次自己由反身反返去正面，叻叻豬😍

2022年11月17號

今晚媽咪煮雞，我同啊b講雞肶係媽咪（我）架，你食雞胸啦，反正你都唔識分，啊b即刻（啊！）一聲，好似反駁緊：我識分架！ 😂真係好攪笑

2022年12月20號

今日婆婆抱住啊b出廳，坐响sofa 睇電視，我企响啊b前面，話你唔睇得電視個喎，跟住啊b叫[啊！] 如是者重複咗3次，好似閙緊我喂！唔好阻住我睇電視😆😆 笑死

2023年1月29號

今晚同啊b睇英文卡，教佢睇完一張掀去後邊，佢好快上手，比起幾個月前快好多，叻叻豬

～～～～～～～～～～～～～～～～～～～～～～～～

做咗媽咪之後，想起了很多舊回憶

想起了細個爸媽帶我去睇青龍白虎

想起了以前成日去石澳燒嘢食，仲有locker借，仲有三號風球出海灘游水，有爸爸同佢best friend 救生員，擔心死啊媽，但我當時覺得刺激好玩😂

去大尾督燒嘢食，買咗可以吹波波既膠，可以吹到好大個波，好玩

想起了爸爸媽媽帶我去放風箏，果時30蚊一個風箏真係好貴，又話第日整個玻璃線既唔駛被人介斷

中秋時媽咪變魔術，變咗幾個燈籠出黎

去澳門，大人去賭場，我地小朋友在歡樂天地玩，

我最鐘意就係玩射牙

～～～～～～～～～～～～～～～～～～～～～～～